Скопје/Софија, септември 2026 година – Универзитетот „Мајка Тереза“ во Скопје, преку Економскиот факултет, презема конкретни чекори кон воспоставување научна соработка со Бугарската академија на науките. Оваа иницијатива е насочена кон подготовка и развој на меѓународни проекти во рамките на престижните европски програми, како што се COST и Horizon Europe.
Делегацијата на Економскиот факултет при УМТ ја сочинуваа раководниот академски кадар, предводен од проректорот за финансии, вонр. проф. д-р Бујамин Бела, деканката на Економскиот факултет, вонр. проф. д-р Букурије Имери Јусуфи, сенаторката вонр. проф. д-р Зана Беќири Лума, продеканката вонр. проф. д-р Теута Јусуфи Зенку, како и доц. д-р Лиридон Зенку.
Во фокусот на соработката е развојот на европски интердисциплинарни иницијативи и мрежи во областа на вештачката интелигенција, анализата на податоци, математичкото моделирање и системите за поддршка на одлучувањето, со посебна примена во економијата, финансиите и јавниот сектор.
Во овие рамки, идентификувани се неколку потенцијални насоки за соработка, меѓу кои:
· AI4ECON-EDU – Artificial Intelligence and Data Analytics for Economic and Financial Decision Making
· BALKAN-AI HUB – Southeast European Excellence Hub for AI-Driven Economic and Financial Decision Support
· TRUST-AI-ECO – Trustworthy and Explainable AI for Economic, Financial and Public-Sector Decision Making
Соработката има за цел создавање можности за развој на заеднички проекти во рамките на COST, подготовка на заеднички апликации во Horizon Europe, реализација на истражувања во областа на вештачката интелигенција и математичкото моделирање, анализа на ризикот, финансиската стабилност и неизвесноста, економски предвидувања и донесување одлуки засновани на податоци, развој на обуки и летни школи, унапредување на академската мобилност, како и реализација на заеднички публикации.
Овој пристап има за цел да ја зајакне координацијата на научноистражувачката работа, развојот на капацитетите, академската мобилност и воспоставувањето нови европски партнерства, создавајќи нови можности за професорите, истражувачите, докторандите и студентите на Универзитетот „Мајка Тереза“ во Скопје.