Скопје, 6 октомври 2025 – Ректорот на Универзитетот „Мајка Тереза“ во Скопје, проф. д-р Беким Фетаји, денеска во својот работен кабинет ја пречека амбасадорката на Јапонија во Република Северна Македонија, Нејзината Екселенција г-ѓа Сецуко Кавахара, со која оствари пријателска и продуктивна средба.

За време на средбата, ректорот Фетаји, придружуван од проректорката за меѓународна соработка, вонр. проф. д-р Дитурије Исмаили, и генералниот секретар, м-р Пиштар Луфтиу, ја информираше амбасадорката Кавахара за најновите академски и институционални развои на УМТ, со посебен акцент на процесите на интернационализација, интеркултурните програми и иницијативите за соработка со универзитети од различни делови на светот.

Во овој контекст, ректорот Фетаји го нагласи ангажманот на Универзитетот за воспоставување на нови мостови на соработка со образовните и научните институции од Јапонија, во областите на технологијата, иновациите, образованието и културата.

Од нејзина страна, амбасадорката Кавахара изрази интерес за продлабочување на билатералните односи во областа на високото образование, и ги пофали напорите на Универзитетот „Мајка Тереза“ во Скопје за промовирање на интеркултурниот дијалог и меѓународната академска размена.

Средбата се одвиваше во пријателска и соработувачка атмосфера, отворајќи нови можности за интензивирање на контактите помеѓу УМТ и академските институции од Јапонија.