Скопје, 14.09.2026 – Универзитетот „Мајка Тереза“ во Скопје денес направи значаен чекор кон проширување на меѓууниверзитетската соработка, со потпишување на Меморандум за соработка со Европскиот универзитет во Скопје. Договорот беше потпишан на официјална средба од страна на ректорот на УМТ, проф. д-р Беким Фетаји, и ректорката на Европскиот универзитет, проф. д-р Билјана Англеска-Богдановска.

Овој Меморандум има за цел развивање на академските врски и продлабочување на научноистражувачката соработка меѓу двете институции, вклучително и во области од заеднички интерес, како што се заедничко развивање на студиски програми, како и студиски програми Joint degree и Double degree, заедничка организација на научни проекти, симпозиуми, конференции и работилници, размена на академски кадар (наставници и соработници) и студенти од сите циклуси на студии, како и соработка во областа на заедничка промоција.

На средбата, ректорот Фетаји беше придружуван од проректорот проф. д-р Фати Исени, генералниот секретар д-р Рахим Јашари, како и професорот Мики Рунтев.

Потпишаниот договор денес ја нагласува посветеноста на двата универзитета за интегрирање на нивните искуства и капацитети, отворајќи нови перспективи за студентите и академскиот кадар на двете институции.