Скопје, 29.10.2026 година – Ректорот на Универзитетот „Мајка Тереза“ во Скопје, проф. д-р Беким Фетаји, денеска оствари официјална средба со заменик-министерот за внатрешни работи на Република Северна Македонија, проф. д-р Астрит Исени. По конструктивната средба на двете делегации, институционалната соработка беше официјализирана со потпишување Меморандум за разбирање.

На средбата, ректорот Фетаји беше придружуван од проректорите, проф. д-р Фати Исени, проф. д-р Дитурије Исмаили и вон. проф. д-р Бујамин Бела, додека заменик-министерот Исени беше придружуван од шефот на неговиот кабинет, м-р Ниметула Јакупи.

За време на работната средба, ректорот Фетаји го запозна заменик-министерот Исени со развојот и академските достигнувања на УМТ, како и со институционалните капацитети во областа на науката, високото образование и подготовката на нови стручни кадри.

Со потпишувањето на овој Меморандум, УМТ и Министерството за внатрешни работи се согласија да воспостават блиски партнерски односи, кои ќе опфаќаат размена на знаења и експертиза меѓу академскиот кадар и експертите на Министерството, заеднички образовни и истражувачки активности, вклучително и национални и меѓународни проекти, симпозиуми, конференции и научни публикации, како и организирање обуки, семинари и стручни предавања. Дополнително, ќе се отворат можности за реализација на студентска практична настава за студентите на УМТ.

Ова ново партнерство претставува значаен чекор во унапредувањето на меѓуинституционалната соработка, создавајќи нови мостови на поврзување меѓу академската заедница и институциите за јавна безбедност во земјата.