Скопје, 17.11.2026 година – Денес, на Универзитетот „Мајка Тереза“ во Скопје, успешно се одржа семинарот за унапредување на капацитетите на академскиот кадар под наслов „Развој на кадарот 2026“. Настанот го обедини академскиот кадар, деканите, продеканите, координаторите на студиските програми и раководството на Универзитетот, со цел унапредување на наставните практики, оценувањето и академската поддршка на студентите.

Семинарот го отвори ректорот на УМТ, проф. д-р Беким Фетаји, кој истакна дека развојот на академскиот кадар добива целосно значење тогаш кога неговите резултати директно се одразуваат врз секојдневното искуство на студентите, преку појасни насоки, навремено советување и методи на оценување што го мерат критичкото размислување и практичната примена на знаењата. Ректорот ја нагласи важноста од поврзувањето на дигиталната трансформација, одговорната употреба на вештачката интелигенција во образованието и тесната соработка со бизнис-секторот, повикувајќи ги факултетите уште од наредниот семестар да применат конкретни промени во своите студиски програми.

Програмата на семинарот, модерирана од проф. д-р Гента Спахија Мирзо, се одвиваше во четири тематски сесии.

Во првата сесија се дискутираше за институционалната дигитализација. Г-дин Фестим Камбери ја презентираше платформата за дигитализација на Универзитетот, ставајќи акцент на олеснувањето на пристапот на студентите до информации и намалувањето на административниот товар на академскиот кадар.

Во втората сесија се разработуваше темата за академско советување. Г-ѓа Бурбуќе Хамзаи ја претстави поддршката и насочувањето на студентите преку академско советување, со фокус на развојот на вештините за учење, поставувањето цели и следењето на академскиот напредок.

Во третата сесија посебен акцент беше ставен на примената на вештачката интелигенција во образованието. Ректорот на УМТ, проф. д-р Беким Фетаји, ја анализираше улогата и влијанието на вештачката интелигенција во наставата, презентирајќи практични пристапи за изработка на задачи во кои студентите ги користат алатките на вештачката интелигенција на транспарентен начин, ги проверуваат изворите и го аргументираат сопственото критичко размислување.

Во четвртата сесија се дискутираше за усогласувањето на студиските програми со потребите на пазарот на трудот. Г-дин Сами Морина, претседател на Управниот одбор на Стопанската комора на Северозападна Македонија (СКСЗМ), ја претстави перспективата на работодавачите во однос на практичните вештини што им се потребни на дипломираните студенти, нагласувајќи ја важноста на студиите на случај, критичкото размислување и непосредното поврзување на студиските програми со професионалната практика.

На завршницата на семинарот беа утврдени конкретни следни чекори за академските единици. Во рамките на заклучоците од семинарот, секој факултет на УМТ доби задача, во соработка со факултет од друг универзитет, да подготви нова студиска програма со двојна диплома, најмалку на магистерско ниво (Master).

By