Скопје, октомври 2025 – На годинешното издание на натпреварот Balkan Green Ideas 2025, тимот од Факултетот за технолошки науки при Универзитетот „Мајка Тереза“ во Скопје ја претставуваше Северна Македонија и беше прогласен за регионален победник со иновативната идеја EcoScrub – природен крем направен од талогот од кафе.

Овој петдневен натпревар, кој се одржа во Охрид, собра 20 „зелени“ идеи од шест земји од регионот. Меѓу силната конкуренција, EcoScrub се издвои по својата креативна и одржлива пристапност кон органскиот отпад. Победниците беа избрани од страна на меѓународно стручно жири со претставници од Белгија, Австрија, Грција и Бугарија.

Зад оваа иновативна идеја стои посветен академски тим составен од: доц. д-р Зимере Саити Муслији, доц. д-р Дрита Абази и проф. д-р Сани Демири. Нивните повеќегодишни истражувања во областа на одржливоста и повторната употреба на биоотпадот послужија како научна основа за развојот на овој производ.

Овој успех го зацврстува активниот придонес на УМТ во промоцијата на иновациите, науката и одржливоста на регионално ниво.