Скопје, 26.03.2026 година – Најновата научна публикација на авторот д-р Рахим Јашари, насловена: „Теоретско-методолошки пристапи кон проучувањето на безбедносните концепти и толкувањето на исламскиот радикализам“, беше промовирана во просториите на Универзитетот „Мајка Тереза“ во Скопје. Оваа обемна студија, објавена на албански и македонски јазик, претставува важен придонес во областа на безбедносните науки и социологијата на религијата.
Ректорот на УМТ, д-р Беким Фетаји, во својот поздравен говор, му честиташе на авторот за неговата интелектуална храброст и научна строгост во решавањето на толку сложена и деликатна тема за нашето општество, нагласувајќи дека УМТ станува важен центар на знаењето.
Проф. д-р Цане Мојаноски, во својство на рецензент, делото го оцени како солидно теориско и квалитетно истражување, при што истакна дека „ова е оригинален научно-истражувачки труд кој нуди епистемолошка критика на знаењата во областа на безбедноста. Авторот успеал да изгради поврзувачки мост меѓу теологијата, социологијата и безбедносните науки, нудејќи теориски концепт кој бара објективност и длабоки познавања. Оваа книга ќе биде поттик за младите истражувачи да градат категоријално-поимни апарати за комплексните феномени на радикализацијата.“
Од друга страна, вонр. проф. д-р Дитурије Исмаили го истакна методолошкото значење на книгата, при што рече дека: „книгата на колегата Јашари претставува длабока и избалансирана анализа која ги избегнува стереотипите. Авторот не ја третира религијата како единствен негативен фактор, туку како комплексен феномен што може да придонесе и во градењето на мирот. Употребата на ‘триангулацијата’ како истражувачки пристап – комбинирање на квантитативни и квалитативни методи – го прави ова истражување исклучително стабилно. Тоа е неопходен водич за студентите од втор и трет циклус.“
Авторот на книгата, д-р Раим Јашари, истакна дека објавувањето на ова дело претставува не само висок академски ангажман, туку и лична посветеност кон една област која е истовремено и комплексна и чувствителна за општеството. Откако им се заблагодари на панелистите за нивните длабински анализи, д-р Јашари изјави: „книгата ‘Теориско-методолошки пристапи во истражувањето на концептите на безбедноста и интерпретациите на исламскиот радикализам’ произлезе од долгогодишен академски интерес за начинот на кој концептите на безбедност се третираат во современиот дискурс. Забележав дека многу од овие концепти често се користат на општ и нејасен начин, без доволна методолошка анализа. Токму тоа ме поттикна да изградам посистематизиран пристап, заснован врз научниот метод.“
Во улога на модератор, вонр. проф. д-р Александар Петковски, декан на Правниот факултет, ја отвори церемонијата и ги координираше излагањата на панелистите, давајќи му на настанот висок академски карактер.
Делото на д-р Раим Јашари е поделено во осум поглавја и нуди детална анализа на моделите на радикализација, со посебен фокус на контекстот на Северна Македонија и Балканот. Книгата ја критикува недоволната застапеност на емпириски истражувања во претходните студии и предлага конкретни модели за креирање на државни превентивни политики.
Оваа промоција обедини претставници од академскиот живот, раководители на институции, како и студенти, отворајќи научна дебата за потребата од негување на дијалогот и објективноста во третирањето на предизвиците на глобалната безбедност.
