Во рамките на Факултетот за информатички науки при Универзитетот „Мајка Тереза“ во Скопје, се одржа технолошкиот настан GitHub Copilot Dev Days 2026, посветен на вештачката интелигенција и нејзината примена во современиот развој на софтвер.

Настанот беше организиран на иницијатива и со ангажман на доц. д-р Фисник Доко, професор на Факултетот за информатички науки при УМТ и Microsoft Most Valuable Professional (MVP), преку соработка помеѓу Albanian Azure User Group и Macedonian .NET Community.

На почетокот на настанот, на присутните им се обрати и деканката на Факултетот за информатички науки, доц. д-р Мајлинда Аџиу, која им посака добредојде и ја изрази својата поддршка за организирање активности што ги поврзуваат академските знаења со современите технолошки достигнувања.

За време на настанот, студентите и учесниците имаа можност да се запознаат со GitHub Copilot, алатка базирана на вештачка интелигенција, која им помага на програмерите во процесот на програмирање.

Активноста опфати технички презентации, практични демонстрации и работилница, во рамките на која учесниците ги применија стекнатите знаења во конкретни програмерски предизвици, користејќи го GitHub Copilot за генерирање код и креирање барања за спојување на кодот (pull requests).

Овој настан претставува значаен чекор кон зајакнување на соработката помеѓу Факултетот за информатички науки, професионалците од технолошката индустрија и заедниците на софтверски развивачи.

Преку вакви иницијативи, Факултетот за информатички науки при Универзитетот „Мајка Тереза“ во Скопје ќе продолжи да ги промовира иновациите, развојот на практичните вештини кај студентите и интеграцијата на технологиите засновани на вештачка интелигенција во образовниот процес и професионалниот развој.