Shkup, 22.01.2026 – Në ambientet e Universitetit “Nënë Tereza” në Shkup, sot u mbajt mbledhja konstituive e Kuvendit Studentor Universitar, me qëllim zgjedhjen e udhëheqësisë së re që do të përfaqësojë zërin e studentëve në organet drejtuese të universitetit.

Në një atmosferë demokratike dhe bashkëpunuese, anëtarët e Kuvendit zgjodhën në mënyrë unanime Besar Sejdiun si Kryetar të ri të Unionit Studentor. Besimi i dhënë ndaj tij u konfirmua me 22 vota pro dhe asnjë votë kundër, duke dëshmuar unitetin dhe vizionin e përbashkët të studentëve për të ardhmen e tyre akademike.

Kuvendi Studentor Universitar luan një rol kyç në UNT, duke shërbyer si urë lidhëse midis studentëve dhe drejtorisë Rektoriale. Ky bashkëpunim është thelbësor për të mbështetur misionin e universitetit si një qendër për shkencën ndërdisiplinore dhe kërkimin shkencor.

Me zgjedhjen e udhëheqësisë së re, Universiteti “Nënë Tereza” në Shkup riafirmon përkushtimin për një vetëqeverisje studentore të fortë dhe aktive. Kryetari i sapozgjedhur, Besar Sejdiu, pritet të udhëheqë nismat që do të avancojnë të drejtat e studentëve, do të pasurojnë jetën kulturore e sportive dhe do të kontribuojnë në rritjen e cilësisë së procesit edukativo-arsimor në të gjitha njësitë akademike të universitetit.