Shkup, 02.02.2026 – Rektori i Universitetit “Nënë Tereza” në Shkup, Prof. Dr. Bekim Fetaji, priti sot në një takim pune u.d. kryetarin e Odës Ekonomike të Maqedonisë Veriperëndimore, z. Nuhi Aliu.

Në këtë takim, rektori Fetaji ishte i shoqëruar nga ekipi i prorektorëve, Prof. Inor. Dr. Bujamin Bela, Prof. Inor. Dr. Diturije Ismaili dhe Prof. Inor. Dr. Fati Iseni, ndërkaq, z. Aliu shoqërohej nga drejtori Ekzekutiv i OEMVP-së, z. Durim Zekiri të cilët gjatë takimit zhvilluan një bashkëbisedim konstruktiv mbi nevojën e ndërlidhjes së drejtpërdrejtë të arsimit të lartë me kërkesat e sektorit të biznesit.

Palët u dakorduan për krijimin e grupeve të përbashkëta punuese në nivel institucional, me qëllim që në të tetë fakultetet e UNT-së të realizohet integrimi i OEMVP-së në kurikulat e reja dhe të përfshihet më thelbësisht puna praktike e studentëve konform profileve të tyre studimore.

Ky bashkëpunim do të mundësojë realizimin e praktikave profesionale në kompanitë anëtare të OEMVP-së, organizimin e Panaireve të Biznesit dhe “Ditëve të Inovacionit” për nxitjen e sipërmarrjes, si dhe shfrytëzimin e kërkimeve dhe punimeve shkencore të studentëve të ciklit të dytë (Master) si zgjidhje praktike për sfidat reale të industrisë.

Ky takim mes UNT-së dhe OEMVP-së, ka edhe për qëllim për të krijuar një sinergji ku dija akademike dhe praktika ekonomike bashkohen për të prodhuar kuadro cilësore që do të jenë bartës të zhvillimit ekonomik në vend.