Shkup, 24.08.2026 – Sot, në ambientet e Universitetit “Nënë Tereza” në Shkup, filloi zyrtarisht procesi i regjistrimit të studentëve për ciklin e parë dhe të dytë të studimeve, për vitin akademik 2026/2027.
Me këtë rast, rektori i UNT-së, Prof. Dr. Bekim Fetaji, i shoqëruar nga prorektorët, Prof. Dr. Fati Iseni dhe Prof. Dr. Sani Demiri, si dhe kryetarja e Komisionit të Regjistrimit në nivel universitar, Prof. Inor. Dr. Arta Xhelili, vizituan hapësirat ku po realizohet aplikimi. Ata i uruan studentëve të rinj mbarësi dhe suksese të shumta në rrugëtimin e tyre të ri akademik.
Për këtë vit akademik, Universiteti “Nënë Tereza” ofron gjithsej 1,957 vende të lira për studentët e ardhshëm të ciklit të parë (Bachelor) dhe të dytë (Master), të shpërndara në 8 njësitë e tij akademike:
Fakulteti i Ndërtimtarisë dhe Arkitekturës
Fakulteti i Shkencave Informatike
Fakulteti i Shkencave Teknike
Fakulteti i Shkencave Teknologjike
Fakulteti i Shkencave Sociale
Fakulteti i Shkencave Humane
Fakulteti Juridik
Fakulteti Ekonomik
Udhëzim për aplikuesit: I gjithë procesi i aplikimit nis me regjistrimin online në portalin zyrtar: portal.unt.edu.mk/apply
Pas përfundimit të aplikimit elektronik, kandidatët duhet të dorëzojnë fizikisht dokumentacionin përkatës (vërtetimin e aplikimit online së bashku me dokumentet origjinale) pranë komisioneve të fakulteteve ku kanë aplikuar.
